صفحه نخست / آخرین مطالب / خورشید بانو (ناتوان) آذربایجانین گؤرکملی شاعیر خانیمی

خورشید بانو (ناتوان) آذربایجانین گؤرکملی شاعیر خانیمی

قاراباغین سونونجو خانیم حاکیمی، مهدی قولو خان جوانشیرین قیزی، ابراهیم خلیل خانین نوه سی دیر.

قاراباغین سونونجو خانیم حاکیمی، مهدی قولو خان جوانشیرین قیزی، ابراهیم خلیل خانین نوه سی دیر. خورشید بانو ۱۲۱۱ – جی ایلده شوشادا آنادان اولموشدور. خورشید بانو آییله نین تک اؤولادی، هم ده قاراباغ خانلیقلارینین سونونجو واریثی اولدوغو اوچون، اونو سارایدا “تک اینجه” و ائل آراسیندا ایسه “خان قیزی”چاغیرمیشلار.
ایلک تربیه چی سی سارایین تجربه لی دایه و خانیم مربی لری اولموشدورلار.مکتب یاشینا چاتدیغدا ایسه ائوده دؤورانین عالیم و صنعت کارلاریندان درس آلماغا باشلامیشدیر. اؤگرتیم زامانی خورشید بانو قوران آیه لرینی و دینی احکام لاری ازبرله مک له یاناشی، دنیوی علم لرله ده تانیش اولموشدور. عظمت لی آییله لرین اوشاقلاریینا بیر قایدا اولاراق دوغما دیلی ایله برابر ، عرب و فارس دیلی، تعلیم ائدیلیردی، خان قیزی دا بو دیللری اؤیرنمیش ، اونلارین واسیطه سییله کلاسیک شاعیرین قایدا – قانون لارین اؤیرنمیش دیر . او لازیم درجه ده بیلیم الده ائتدیکدن سونرا منظم صورت ده مطالعه ایله مشغول اولموشدور. شرق شاعیرلرین اله دۆشن نادیر کیتاب لاری ، قیمت لی ال یازمالاری خورشید بانونو کلاسیک ادبیاتا باغلامیشدیر. تاریخ چی لرین احتمالینا گؤره ، بو دؤوراندا خارجی و داخلی وضعیتین جیدی صورت ده گرگینلشمه سییله علاقه دار خان آییله لری اۆزرینده نظارت گۆجلندیریلمیش و خورشید بانو (خاسای خان اۇسمییئو ) له ایزدیواج ائتمه یه مجبور قالمیش.

۱۲۲۹ -جی ایلین پاییزیندا خاسای بَی شوشایا گلیب توی ائتمیش دیر و خورشید بانونو داغیستانا – اؤز دوغما کندینه ، اوردان دا تیفلیسه آپارمیش دیر.
خورشید بانو خانیم ایکی بؤیوک قاراباق خانلیق لارین ائل لری جوانشیرین و زیاد اوغلو قاجارلارین قانینداندیر.
ناتوان ایکینجی دفعه ۱۲۴۸ -جی ایلده رعیت ایچره سیندن چیخمیش سید حۆسین آدلی بیر شوشالی شخص ایله اره گئتمیش و بو حرکت ایله بَی و ملک دارلاری غضب لندیرمیش دیر. اونلار ناتوان آییله عضولاری آراسیندا تفرقه سالاراق ، اوغلو مهدی قولو خانین ائودن باش گؤتوروب گئتمه سینه سبب اولموشدولار. شاعیر خانیم عۆمور بویو قیناق و تهمت لردن یاخا قورتارا بیلمه دی.
خورشید بانو شخصی چتین لیک لر، دؤورانین حاقسیزلیقی، ظالیم لرین ستم لری شاعری قوجالتمیش، اونو حیات ایشیغینا حسرت قویموشدور.
آغلاماقدان گؤزلرینین نورو گئتمیش ، بدنی طاقتدن دوشموشدور.

۱۲۷۶ -جی ایل وفات ائتمیش دیر و آغ دام “ایمارت “قبرستان لیغیندا دفن اولونموشدور. بَی محمد اوو”خورشید بانو ناتوان ” کیتابیندا یازیر:”حتا خاطیره لرده ناتوان (خانلیق شوکور) آدلی تانینان خیدمتچیسی موسیقی تعلیمی وئرمک له اونو مشهور مۆغنی ائتمسیندن ده دانیشیلیر “( صفحه ۶۰)
ناتوان یارادیجیلیق فعالیتی تکجه شعرله بیتمیر . او رسام لیقلادا مشغول اولوردو ، هم چینین ، اونون نفیس اَل ایشلری ، مۆختلیف ژانرادا تیکمه لر باجاریغی دا اولموشدور.
گنج شاعیر شوشادا ” مجلس انس” ادبی مجلیسنی تشکیل ائتمیش دیر. ۱۲۵۲ -جی ایلده شوشایا سو کمرینی چکدیرمیش دیر :بو سو کمری ایندی ده “خان قیزی بولاغی آدی ایله مشهوردور. ناتوان آراز چاییندان میل دۆزونه ده سو کمری چکمه یه ایقدام ائتمیش دیر.

فرشته طلعت و مه روی و خوش لقا، گئتمه
جمالی قلبیمه دائم وئرن ضیا، گئتمه

مسیح تک، نفسی مرده‌نی ائدن احیا
دهانی ایچره اولان چشمه-ی بقا گئتمه

اسیر- دانه اولوب، دام- زلفه دۆشدو کؤنول
او نوع سیلسیله دن کیم ائدر رها، گئتمه

مریض- عشق اولانا نئیله‌سین طبیبِ زمان
سوای شهدِ لبین یوخدو بیر دوا، گئتمه

کمال شوق‌له قوی ائیله‌ییم خلیل آسا
او خاک مقدمینه جانیمی فدا، گئتمه

اگر فراقینی گؤرسم، گؤرن گؤزوم چیخسین
گؤزومده خاک رهین عین توتیا، گئتمه

طواف کویده سعیم نئجه اولور حاصل؟
اونا کی، ذکر لبین وئرمه‌سه صفا، گئتمه؟

خزینه گوهری تک اولماسان نهان گؤزدن
وجودونو ائله‌ییب محض کیمیا، گئتمه

رقیب طعنه‌سی، هجران غمی اولور مشکل
بو ناتوانه گؤروب اونلاری روا، گئتمه

خورشید بانو ناتوان

مبنع :
۱- خورشید بانو ناتوان اثرلری ؛ بَی لر محمد اوو
۲- خان قیزی… ؛جمیل تقی یئو

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *