صفحه نخست / آخرین مطالب / ربابه مراداوا اونلو اردبیل‌لی صنعت‌کارین وفات ایل دؤنومو

ربابه مراداوا اونلو اردبیل‌لی صنعت‌کارین وفات ایل دؤنومو

بوگون 28 آگوست اونلو تئاتر اویونچوسو و گؤزل سسلی ماهنی سؤیله ین "ربابه مرادووا"(اشراقی) نین وفات ایل دؤنومودور.

چئویریب حاضیرلایان: ویدا حشمتی

ربابه اشراقی یا ربابه مراداوا ۱۹۳۰-جو ایلده اردبیل شهرینده، عالی قاپو محله سینده دوغولدو. گنج چاغلاریندا اردبیل تئاتر و موسیقی قوروپلارینا قاتیلدی. آتاسی میرزا خلیل خوش سسلی بیر موللا ایدی. او قرآنی خوش سسله اوخویاردی. ربابه آذربایجان ماهنیلارین رادیو دان ائشیتدیکده، بیر اوخویوجو اولدوغونو آرزیلاردی. آتاسی اونون علاقه سیندن خبری اولوب، سؤز وئرمیشدی باکو دا موسیقی فاکولته‌سینه یوللاسین.

۱۹۴۳-جو ایلده آذربایجان جمهورییتینه گئدیب، آدلیم اوستادلاردان درس آلدی. او زامانلار قیزلار یا تهران‌دا درس آلمالی ایدی یا ایران‌دان ائشیکده.

ربابه ایران‌دان گئدندن سونرا ایران و شوروی آراسیندا سیاسی آنلاشمازلیقلاردان دولایی، بیر داها ایرانا قاییدا بیلمه‌دی. او ۱۹۵۳-جو ایلینده باکو شهرینین آصف زینالی فاکولته‌سینده‌کی درس‌لرین بیتیردی. ۱۹۵۴-جو ایلده آذربایجان اپرا-تئاتر بالتینده چالیشماغا باشلادی. اونون چئشیدلی ایفالاری خاطیره‌لردن سیلینمه‌یه‌جک.

لیلی رولونو لیلی – مجنون اپراسیندا و اصلی رولونو اصلی – کرم اپراسیندا نئچه ایللر ایفا ائتدی. عاریف بابایف لا نزاکت تئیموراوا نین اعترافینا گؤره کیمسه ربابه قدر گؤزل هابئله اینجه‌لیکله بو رولو ایفا ائده بیلمه‌میشدیر. ربابه خانیم اؤزو بویورموشدو: من لیلی نقشینی ایفا ائتمه‌ییرم بلکه بیر ماهانا دیر اؤز بخت – اقبالیمی ایفا ائده‌م. منیم اوخودوغوم آنا دوغما یئریم اردبیل اوچوندو.

او عؤمرونون سون گونلرینده دیابت خسته‌لیگی توتور. باجیسی طاهره خانیم بئله دئییر: ربابه خسته یاتاغیندا ایدی. ۱۹۸۳-جو ایلینده باکو شهرینده اولارکن، اردبیل حسرتینده یانیردی. ۵۳ یاشیندا اؤلمه‌دن اؤنجه وصییت ائله‌دی منیم تؤره‌نیمده اوستاد کامیل قوپوز چالسین، بیرده بیر اووج اردبیل تورپاغیندان منیم قبریمه تؤکولسون کی قرارسیز اوره‌ییم آرام – قرار تاپسین.

میر احمد عسکرلی سینیر ایشله‌یه‌نلریندن بئله دئییر: ربابه خانیم چوخلو کنسرتلرینی آستارا سینیرلارینا یاخین شهرلرده ایفا ائده‌ردی. چونکو ایسته‌یردی اردبیله یاخین اولسون. بیر گون آستارادا (شوروی آستارا شهری) مندن ایسته‌دی سینیر قاپیسین آچام کی اؤزونو اردبیله یاخین حیس ائله‌سین. من بوتون یاساقلارا رغمن، ربابه خانیمین حؤرمتی اوچون بو ایشی گؤردوم. ربابه خانیم کؤرپو اوسته، قارا گیله ماهنی‌سینی حزین سسله ایفا ائده‌رکن من گؤز یاشلاریندا بوغولدوم.

روحو شاد اولسون.

 

یک دیدگاه

  1. روحو شاد اولسون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *